Wéi fillt et sech un, wann ee mat Blannestéck duerch d’Schoulgebai geet? Wéi kann ech eng blann Persoun am Alldag ënnerstëtzen? A wéi funktionéiert eigentlech d’Brailleschrëft? Mat dëse Froen hu sech d’Schülerinnen a Schüler aus dem Zyklus 3 an der leschter Woch auserneegesat.

D’Associatioun A.M.V.A. (Association pour Malvoyants et aveugles) huet spannend Workshops an eise Klasse gehalen, fir eis méi no ze bréngen, wéi d’Liewe vu blannen a séibehënnerte Leit ausgesäit. Ënnert dem Slogan aidez– moi à voir autrement  setzt d’Organisatioun sech schonn zënter ville Joren dofir an, dass d’Mobilitéit an d’sozial Integratioun vu betraffene Persoune verbessert gëtt.

No enger aféierender Erklärung iwwert d’Schwieregkeeten, mat deene blann a séischwaach Leit all Dag konfrontéiert sinn, haten d’Kanner d’Méiglechkeet, selwer an dës Situatioun eranzeklammen. Blann hu si probéiert, duerch d’Schoul ze navigéieren.  Doriwwer eraus hu si geléiert, wéi een eng blann Persoun richteg begleed a guidéiert, sou dass si sécher a selbstbewosst ka virugoen.

E weidere spannende Punkt war d’Entdeckung vun techneschen Hëllefsmëttelen, déi den Alldag vu blanne Mënsche méi einfach maachen. D’Kanner ware faszinéiert vu blannefrëndleche Spiller an hunn sech mat der Brailleschrëft beschäftegt – e Schrëftsystem, den op erhiewte Punkte baséiert a mat de Fangere gelies gëtt.

Zum Schluss war eng oppen Froeronn, bei där all Fro erlaabt war. D’Schülerinnen a Schüler hu

vill intressant Froe gestallt a sech bewosst gemaach, wéi wichteg et ass, Sensibiliséierungsaarbecht an dësem Beräich ze leeschten.

Dëse Workshop war net nëmmen eng Léierstonn, mee och eng richteg Erfarung fir eis Kanner! E grousse Merci un d’AMVA fir hiren Asaz a fir d’Méiglechkeet, eng nei Perspektiv op d’Welt ze kréien.