E Freide war et erëm esou wäit: D‘Schülerinnen a Schüler hunn sech mat giele Vesten a grousse Poschen equipéiert a sinn ausgeschwäermt, fir d‘Ëmgéigend vun der Schoul ze botzen. Mat vill Äifer an Teamgeescht hu si sech an d‘Aarbecht gestierzt an eng Partie Knascht gesammelt.

D‘Kanner gouffen a verschidde Gruppen agedeelt: Déi eng hunn de Schoulhaff, d´Spillplaz an de Fussballsterrain gebotzt, wärend aner Gruppe bis an de Lenze Park gaange sinn. E puer Kanner hunn och d‘Wiss beim B13 propper gemaach.

Dëse flotten an nëtzlechen Dag huet net nëmmen d‘Ëmwelt e Stéck méi propper gemaach, mee och d‘Kanner sensibiliséiert, wéi wichteg et ass, eist Ëmfeld propper ze halen. Mat hire giele Vesten a groussen Tuuten ware si net ze iwwersinn – richteg Ëmwelthelden am Asaz!

Mam gudde Beispill virgoen – dat war d’Motivatioun vun eisen engagéierte Schüler, déi gewisen hunn, wéi een duerch kleng Gesten e grousse Bäitrag leeschte kann.

E grousse Merci un all d‘Kanner fir hiren Asaz a fir hiert Engagement fir eng méi propper Zukunft!